La xenialidá de la masa

Torna al asturianu fecha por Laura Marcos en 2010, que podéis visitar nel enllaz orixinal

hai trapacería, odiu, violencia, absurdu abondos nel ser humanu
mediu como pa suministra-y a cualquier exércitu un día cualquiera
y los que meyor achuquinen son los que prediquen contra ello
y los que meyor odien son los que prediquen l’amor
y los meyores na guerra al final son los que prediquen la paz
los que prediquen a dios, necesiten dios
los que prediquen la paz nun tienen paz
los que prediquen l’amor nun tienen amor
cuidáu colos que prediquen
cuidáu colos que saben
cuidáu colos que yá tan lleendo llibros
cuidáu colos qu’odien la probeza
o tan orguyosos d’ella
cuidáu colos d’afalagu fácil
porque necesiten que-yos lu devuelvas
cuidáu colos que censuren fácil
tienen mieu de lo que desconocen
cuidáu colos que siempre busquen la masa pues
nun son nada solos
cuidáu del home mediu la muyer media
cuidáu col so amor, el so amor ye mediocre
busca al mediocre
pero hai xenialidá nel so odiu
hai xenialidá a esgaya nel so odiu como pa matate
pa matar a cualquiera
como nun quieren la soledá
nun entienden la soledá
tratarán de destruir cualquier cosa
distinta a lo d’ellos
como nun puen crear arte
nun entienden l’arte
van considerar el so fracasu creador
como un fracasu del mundu
como nun puen querer plenamente
van creer que’l to amor ye incompletu
y van odiate
y el so odiu va ser perfectu
como un diamante que rescampla
como un cuchiellu
como un monte
como un tigre
como la cicuta
la más bella de les sos artes