domingo, 2 de agosto de 2015

¿Asina que quies ser escritor?



Si nun te sal ardiendo de dientro,
pesie a too,
nun lo faigas.
Si nun sal espontáneamente del to coral,
y del to maxín y de la to boca
y de les tos tripes,
nun lo faigas.
Si ties que sentate hores
cola güeyada afitada na pantalla del ordenador
o llantáu na to máquina d’escribir
guetando les pallabres,
nun lo faigas.
Si lo faes por dineru o fama,
nun lo faigas.
Si lo faes porque quies muyeres na to cama,
nun lo faigas.
Si ties que sentate
y reescribilo una y otra vegada,
nun lo faigas.
Si te cansa namái pensar en facelo,
nun lo faigas.
Si tas tentando escribir
como cualesquier otru, escaezlo.
Si ties qu’asperar a que salga de ti ruxendo,
aspera pacientemente.
Si nunca nun sal ruxendo, fai otra cosa.
Si primero ties que lleelo a la to muyer
o a la to moza o mozu
o a los tos pás o a cualquiera,
nun tas preparáu.
Nun seyas como tantos escritores,
nun seyas como tantos miles de
persones que se llamen a sí mesmos escritores,
nun seyas sosu y aburríu y aparenciosu,
nun te consumas nel to amor propio.
Les biblioteques del mundu
bocien fasta durmise
con esa xente.
Nun seyas ún d’ellos.
Nun lo faigas.
Quitante que salga del to alma
como un volaor,
quitante que quedate quietu
pudiera llevate a l’alloriu,
al suicidiu o al asesinatu,
nun lo faigas.
A nun ser que’l sol dientro ti
tea quemando les tos tripes, nun lo faigas.
Cuando seya verdaderamente’l momentu,
y si fuisti escoyíu,
asocederá por sí solo y
siguirá asocediendo fasta que muerras
o fasta que muerra en ti.
Nun hai otru camín.
Y enxamás lu hebo.

2 comentarios:

  1. Préstame pela vida esti poema y el to blog más.
    Norabona pol llabor!!
    Comparto en face!

    ResponderEliminar
  2. Préstame pela vida esti poema y el to blog más.
    Norabona pol llabor!!
    Comparto en face!

    ResponderEliminar